Ghusl ka bayan

●Allah ta'ala farmata hai ki:-
"Agar tum junub ho to khub paak ho jayo yaani ghusl karo."

aur farmata hai ki :-
"yahan tak ki weh haiz wali aurten achchi tarah paak ho jayen".

Aur farmata hai ki :-
" Aye Imaan waalon nashe ki haalat mein namaz ke qareeb na jayo yahan tak ki samajhne lago jo kehte ho aur na janabat ki haalat mein jab tak ghusl na karlo magar safar ki haalat mein wahan paani na mile to ghusl ki jagah tayyammum hai."


●Bukhari aur muslim mein riwayat hai ki ummul momineen Umme sulaim radiyallahu ta'aala anha farmati hain ki 
Umme sulaim radiyallahu ta'aala anha ne arz ki ke,
Ya Rasool ,Allah  ta'ala haq bayan karne se haya nahi farmata to kya jab aurat ko ahtelaam ho  to uss par nahana hai?
farmaya- haan jabki paani (mani) dekhe.
Umme salma radiyallahu ta'aala anha ne  moonh dhaank liya aur arz ki ya Rasool Allah kya aurat ko ahtilaam hota hai?farmaya haan aisa na ho to kis wajah se bachcha maa ki tarah hota hai.

● Abu daaood ibe majah aur timizi Abu hurairah Radiyallahu ta'ala anhu se riwayat karte hain ki  صلی اللہ تعالی علیہ وآلہ وسلم farmate hain ki har baal ke neeche janabat hai to baal dhoyo aur jild ko saaf karo.



Ghusl ke faraiz

●Gusl ke teen juz hai agar unmein se ek mein bhi kami hui gusl na hoga chahe yuñ kaho ki  gusl ke teen farz hai. 



1-Kulli karna:- 

◇◇◇ Muñh ke har purze goshe hoñth se halaq ki jadd tak har jagah paani beh jaaye aksar log yeh jaante hai ki thoda sa paani muñh mein lekar ugal dene ko kulli kehte hai agarche zubaan ki jadd aur halq ke kinaare tak na pahuche aise gusl na hoga na iss tarah nahaane ke baad namaz jayez balki farz hai ki dadhoñ ke peeche gaalon ki teh mein daatoñ ki jad aur khidkiyon mein zubaan ki har karvat mein halaq ke kinaare tak paani bahe. 

Masla - Daatoñ ki jadhon ya khidkiyon mein koi aisi cheez jami ho jo paani behne se roke toh uska chhudana zaroori hai agar chhudane mein nuksaan na ho jaise chaliyon ke daane, gosht ke reshe aur chhudane mein nuksaan aur harj ho jaise bohet paan khane se daanton ki jadhon mein chuna jam jaata hai ya aurton ke daanton mein missi ki rekhe ki unke cheelne mein daanton ya masoodon ke nuksaan ka khatra hai toh maaf hai.

2-Naak mein paani daalna - 

◇◇◇ yaani dono nathoñ mein jahañ tak narm jagah hai dhulna ki paani ko soonghkar upar chadaye, baal barabar bhi dhulne se na reh jaaye nahi toh gusl nahi hoga agar naak ke andar renth sookh gayi hai toh uska chhudana farz hai. 

3-Tamaam badan par paani bahaana - 

Yaani sar ke baaloñ se pau'oñ ke talwoñ tak jism ke har purze har rongte par paani behjaana farz hai aksar log balki kuch padhe likhe log yeh karte hai aur samajhte hai ki gusl hogaya halaanki kuch uzv aise hai ki jabh tak unki khaas taur par ehtiyaat na ki jaaye toh nahi dhulenge aur gusl na hoga. 

●Masla-sar ke baal gundhe na hon to har baal par jad se nok tak paani behna aur gundhe hon to mard par farz hai ki unko kholker jad se nok tak paani bahaye aur aurat par sirf jad tar kar lena zaroori hai kholna zaroori nahi.Haan agar choti itni sakht gundhi hai ki be khole jaden tar na hongi to kholna zaroori hai.

● Masla- kaano mein baali baghairah zevron ke suraakh ka wahi hukum hai jo naak mein nath ke surakh ka hukum wuzu  mein bayan hua hai.

● Masla - kisi zakhm par patti wagaira baandhi ho ki uss ke kholne mein harj ho ya kisi jagah marz ya dard ki wajeh se paani behne se nuksaan hoga toh uss purey uzv ko masaah kare aur na ho sake toh patti par masaah kaafi hai aur patti zaroorat ki jagah se zyada na rakhi jaaye nahi toh masaah kaafi na hoga aur agar patti zaroorat ki he jagah par baandhi ho jaise bazu par ek taraf zakhm hai aur patti bandhne ke liye bazu ki utni saari golaayi par hona uska zaroori hai toh uske neeche badan ka woh hissa bhi ayega jise paani nuksaan nahi karta toh agar kholna mumkin na ho agarche yuñhi ke khol kar phirse waise na bandh sakega aur usmein nuksan ka khatra hai toh saari patti par masaah karle kaafi hai badan ka woh accha hissa bhi dhone se saaf ho jayega.

[Bahar e shariat hissa 2 "Ghusl ka bayan".]