Haiz Nifaas istihaza wa junub ka bayan

Ahadees e Mubaraka

》》》》 Allah ta'ala irshaad farmata hai:-

                  "Aye mahboob tumse haiz ke baare mein loge sawal karte hain,to Haiz mein aurton se bachon aur unse qurat(hambistari) na karo jab tak paak na ho len,to jab paak ho jayen unke pass uss jagah se aayo jiska Allah ne tumhe hukum diya.Beshak Allah dost rakhta hai tauba karne walon ko aur dost rakhta hai paak hone walon ko."

》》》》 Sahih bukhari Mein Hai ...

                    Ummul momineen Siddiqa Radi Allahu Ta'ala anha farmati hain ki hum Hajj Ke Liye Nikle. Jab Saraf( Makka Sharif ke qareeb Jagah ka naam )mein pahunche  tu Mujhe haiz Aaya to main ro rahi thi ki Huzoor Alyhissalatu wassalam mere paas tashreef laaye.Farmaya:- Tujhe kya hua ?kya tujhe haiz Aaya?

Arz ki "Haan". 

Farmaya Yeh Ek Aisi Cheez Hai Jisko Allah Ta'ala Ne Adam ki ladkiyon ke liye likh Diya Hai.

Tu khana e ka'aba ke tawaf ke siwa sab kuch adaa kar jise hajj karne wala adaa karta hai.aur farmati hain ki Huzoor ne apni biwiyon ki taraf se ek gaaye  Qurbani ki.

》》》》 Ummul momineen Siddiqa Radi Allahu Ta'ala anha farmati  hain ki haiz ke  Zamaane me Mein  Pani peeti Phir Huzoor ko de deti To Jis Jagah mera moonh Laga Hota Huzoor wahin Apna moonh rakhkar  Peete. aur haiz ki halat mein haddi se ghost noch kar mein  khaati phir Huzoor ko de deti to Huzoor apna moonh us Jagah rakhte jahan mera moonh lgaa hota.

》》》》 Muslim mein unhi  se riwayat hai

Woh farmati hain:-

 ki "Huzoor ne Mujhse farmaya ki Haath Badha kar Masjid se musalla Utha dena. Meine arz kiya mein haiz ki halat mein hoon. Huzur ne farmaya" Tera Haiz Tere Haath Mein Nahi."

》》》》 Bukhari aur Muslim mein Ummul momineen Maimoona Radi Allahu ta'ala Anha se marwi hai,Farmati hain ki ,"

                   Rasool Allah Sallallahu Ta'ala Alyhi wasallam ek chadar mein namaz padhte they jiska kuch hissa mujh par tha aur kuch Huzur par aur mei  haiz ki haalat mein thi."

Haiz kya hai?

BALIGHA AURAT KE AAGE KE MAQAM SE JO KHOON AADI TA'UR PER NIKALTA HAI OR BIMARI BACCHA PAIDA HONE KE SABAB NA HO,USE HAIZ(PERIOD) KEHTE HAIN.

Istihaaza kya hai?

JO KHOON BIMARI KI WAJAH SE AAYE USEY ISTIHAZA KEHTE HAIN.

Nifaas kya hai?

BACHCHA HONE KE BAAD JO KHOON AATA HAI WO NIFAAS KEHLATA HAI.

Haiz aane ki umar wa muddat?

◆◆◆ KAM SE KAM 9 BARAS KI UMAR  SE HAIZ AATA HAI OR 55 BARAS KI UMAR ME KHATAM HOTA HAI.

◆◆◆ HAIZ KI MUDDAT KAM SE KAM 3 RAATEN OR 3 DIN HAI AGAR IS SE KAM HO TO HAIZ NHI YANI POORE 72 GHANTE HAI.

Haiz ke rang

 HAIZ KE 6 RANG HAIN :-

1:SHIYAAH 

2:SURKH

3:SABZ

4:ZARD

5:GADLA

6:MATILA

◆◆◆ Haml(pregnent) aurat ko jo khoon aaya wo istihaza hai.

◆◆◆ Do (2) haizon ke darmiyaan kam se kam poore pandrah (15) days ka faasla zaroori hai.

Yunhi nifaas aur haiz ke darmiyaan bhi 15 din ka faasila zaroori hai.

To agar nifaas khatam hone ke baad 15 din poore na huw they ke haiz aa gya to ye haiz nahi balki istihaza hai.

(Durre mukhtaar,taharat baab fil haiz jild 1 page 524)

Nifaas

Nifaas ki kam se kam koi muddat muqarrar nahi hai.Bachcha paida hone ke baad aadha ghanta(half hour) baad bhi khoon aaya to woh nifaas hai aur nifaas ki zyada se zyada muddat 40 don raat hai.

◆◆◆kisi aurat ko 40 din se zyada khoon aaya to agar aurat ke pehli hi baar bachcha paida hua hai ya ye yaad nahi ki issey pehle bachcha paida hone me kitne din khoon aaya tha to 40 din raat nifaas hai.Baaki istihaza aur jo pehli aadat maloom ho to aadat ke dino mein nifaas hai aur jo issey zyada hai wo istihaza hai.Jaise 30 din nifaas ka khoon aane ki adat thi agar abki martaba 45 din khoon aaya to 30 din nifaas ke maane jaayenge aur 15 din istihaza ke honge.

Haiz wa nifaas ke ahkaam

◆◆◆ Haiz ki halat me namaz pdhna,roza rakhna, Qur'an shareef padhna (khwah dekhkar padhe ya zubaani) Haraam hai.

◆◆◆ Haiz ki haalat me namaz maaf hai or iski qaza bhi nhi lekin roze farz hain inki qaza aur dino me hai.

◆◆◆ kagaz ke parche pe koi aayat ya Surat likhi ho uska choona bhi Haram hai.

◆◆◆ Qur'an majeed ka choona bhi haraam hai.

Haan agar Juzdaan  (cover) me Qur'an majeed ho to us jujudaan ko chune me  koi harz nahi.

◆◆◆ Haalate haiz me kurte ke daman ya dupatte ke aanchal se ya kisi aise kapde se jis ko pehne hue ,ya oodhe hue hai,choona Haram hai.

◆◆◆ Qura'n majeed ke aalawa or tamam ajkaar kalma shreef, durood shreef wagerah haiz wa nifaas ki haalat mein  padhna bila karahat jaiz wa mustahaq hai or in cheezo ko kulli krke ya wuzu krke padna   behtar hai ya aise hi padhliya jaye to koi harz nhi hai.

◆◆◆ Mustahib hai ki namazon ke awqaat mein wuzu karke itni dair tak durood shareef aur doosre wazaif padh liya kare jitni dair me namaz padh sakti thi.taaki aadat baqi rahe.

◆◆◆ Roze ki haalat me ager haiz wa nifaas shuru ho gya to roza jata rahega ,us ki qaza rakhe.

 farz tha to qaza farz hai or nafil tha to qaza wajib hai.

◆◆◆ Ager koi aurat sote waqt paak thi subh uth kr dekha ki asar haiz hai to usi waqt se asar haiz ka shuru ho jaega. Ager raat isha ki namaz nhi pdhi to paak hone per uski qaza farz hai.

◆◆◆ Haiz wa nifaas ki haalat mein sajda e tilawat bhi haraam hai aur sajde ki aayat sunne par bhi uss par sajda wajib nahi.

Istihaza ke ahkaam

◆◆◆  Istihaza me na namaz muaaf hai na roza na aisi aurat se sohbat haraam hai.Istihaza wali aurat namaz bhi padhegi roza bhi rakhegi  ka'abaa me daakhil bhi hogi tawaf e ka'abaa bhi kregi

Qur'an shareef ki tilwat bhi kar sakegi. Wuzu karke Qur'an shareef ko haath bhi lgaa sakegi.Aur isi haalat mein  shauhar ussey hambistari bhi kar sakega.

Junub ke ahkaam

◆◆◆ Aise mard  aur aurat jin par ghusl farz ho gay"junub" kehte hain aur iss napaki ki haalat ko "janabat" kehte hain.Junub khwah mard ho ya aurat jab tak ghusl na kare wo masjid mein daakhil nahi ho sakta.na Qur'an shareef padh sakta hai.na Qur'an dekhkar tilawat kar sakta hai  na zabani padh sakta hai.Na Qur'an majeed ko choo sakta hai. Na ka'aaba mein daakhil ho sakta hai na ka'abaa ka tawaf kar sakta hai.

◆◆◆ Junub ko saath khilaane iss ka jhoota khaane iske saath salaam wa musafaah aur mu'ankaa karne mein koi haraz nahi.

◆◆◆ Junub ko chahiye ki jald se jald ghusl karey kyunki RasoolAllah ne farmaya ki rehmat ke farishte uss ghar mein nahi jaatey jis ghar me tasveer aur kutta aur junub ho.

◆◆◆ Isi tarah ek hadees mein ye bhi aaya hai ki firishte 3 shakhson ke qareeb nahi hotey 

1 kaafir ka murda

2 khulook(aurat ki khushbu istemaal karne wala

3 junub aadmi(magar yeh ki wuzu kare).

◆◆◆ Haiz wa nifaas wali aurat ya aise mard wa aurat jin par ghusl farz hai agar yeh loge Qur'an shareef ki taaleem den to inko laazim hai ki Qur'an majeed ke 1 1 lafz par saans tod tod kar padhayen...maslan iss tarah padhayen ki الحمد padhkar saans toden phir لله parhkar saans toden phir رب العلمين padhen.Ek saans mei  poori aayat lgaatar na padhen aur Qur'an shareef ke alfaaz ko hijje karane mein bhi koi haraz nahi. Qur'an majeed k alaawa aur doosre wazeefe kalima shareef durood sharerf waghairah ko padhna junub ke liye bila karahat jaiz balki mustahab hai.

◇◇●●◇◇●●◇◇